ეკატერინე გალდავა:ქუთაისი გახდება ერთ-ერთი პირველი ქალაქი, რომელსაც საერთაშორისო სტანდარტების წყალარინების ინფრასტრუქტურა ექნება
ქუთაისის წყალარინების პროექტის დასაფინანსებლად ევროპის საინვესტიციო ბანკთან ხელშეკრულება გაფორმდა. შესაბამის დოკუმენტს ხელი მოაწერეს საქართველოს ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა, EIB-ის ვიცე-პრეზიდენტმა ვაზილ ჰუდაკმა და გაერთიანებული წყალმომარაგების კომპანიის დირექტორმა ეკატერინე გალდავამ.
შეთანხმება ითვალისწინებს ბანკის მიერ დამატებით 3 250 000 ევროს ოდენობის გრანტის გამოყოფას, რომლითაც არსებული დეტალური დიზაინი გაუმჯობესდება და ზედამხედველობის საკონსულტაციო მომსახურება დაფინანსდება. გრანტი ევროკავშირის აღმოსავლეთ პარტნიორობის ტექნიკური დახმარების ფონდიდან გამოიყოფა.
,,მნიშვნელოვანია საერთაშორისო დონორი ორგანიზაციების მხარდაჭერა წყალმომარაგებისა და წყალარინების ინფრასტრუქტურის განვითარებისთვის. ევროპის საინვესტიციო ბანკი ჩვენი ერთ-ერთი საიმედო პარტნიორია. დამატებითი ინვესტიაცია, რომლის შესახებაც დღეს მოეწერა ხელი, მოგვცემს შესაძლებლობას დაგეგმილი პროექტები შესრულდეს ხარისხიანად და შესაბამისი სტანდარტების დაცვით. ქუთაისი იქნება ერთ-ერთი პირველი ქალაქი, სადაც წყალარინების ინფრასტრუქტურა სრულიად ახალ, საერთაშორისო სტანდარტების ყველა ნორმას იქნება მორგებული. 2019-2020 წლებში კომპანია, საერთაშორისო დონორი ორგანიზაციებისა მხარდაჭერით, 500 მილიონ ლარამდე ღირებულების სამუშაოების დაიწყებას გეგმავს, რაც მკვეთრად გააუმჯობესებს ცენტრალიზებული წყალმომარაგებისა და გამართული წყალარინების ინფრასტრუქტურის ხელმისაწვდომობას’’-განაცხადა ეკატერინე გალდავამ.
ქუთაისის თანამედროვე წყალარინების სისტემის მშენებლობისთვის ევროპის საინვესტიციო ბანკის მხარდაჭერით 100 მილიონი ევრო უკვე გამოიყო.
