საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანიამ გურჯაანის მუნიციპალიტეტის სოფელ კაჭრეთსა და ზემო კაჭრეთში წყალმომარაგების სისტემის ცენტრალიზაციისა და განახლების პროექტი დაასრულა.

პროექტის ფარგლებში მოეწყო ოთხი ახალი ჭაბურღილი, აშენდა ორი 500 მ³ მოცულობის რეზერვუარი და ორი საქლორატორო. ასევე, მოეწყო 42 კმ სიგრძის წყალმომარაგების ქსელი და დამონტაჟდა 1361 ერთეული AMR ტიპის აღრიცხვის კვანძი.

ერთ-ერთი ჭაბურღილის ექსპლუატაციიდან ერთი წლისა და ორი თვის შემდეგ წყალში სულფატების კონცენტრაციის მატება დაფიქსირდა. წყლის ხარისხის შესაბამისი მაჩვენებლების უზრუნველსაყოფად, კონტრაქტორმა კომპანიამ დამატებით დაამონტაჟა უკუოსმოსის ტექნოლოგიაზე დაფუძნებული წყლის გამწმენდი სისტემა.

სოფელ კაჭრეთსა და ზემო კაჭრეთში 24-საათიანი, უწყვეტი წყალმომარაგებით 3 400-მდე ბენეფიციარი უკვე სარგებლობს.